ORDIZIA ESKUBALOIA
Lehen talde urdiñak, igandean, Majorin jokatutako partidan 30-29 irabazi zion Aloña Mendiri. Nahiz eta taulako posizio-desberdintasuna handia izan, neurketa parekatua aurreikusten zen, eta hala gertatu zen. Talde ordiziarrak baja ugarirekin ekin zion partidari, bigarren taldeko 6 jokalarik osatzen zuten deialdia, baina jokalariek dena jarri zuten eta garaipena lortu zuten. Garaipen garrantzitsua, Ordizia Siglo XX Plater Prestatuak sailkapenaren goiko aldean mantentzen duena.
Partida berdinduta eta oso trabatuta joan zen, atsedenaldira 3 goleko abantailarekin iritsi ziren etxekoak, baina 50. minutuan Oñatiko taldea zen 2 goleko aldea zuena. Azken 10 minutuetan erreakzionatu zuen talde urdinak eta azkenean gol baten errenta lortu zuen.
Taldeak ezin izan zuen Aloñaren kanpoko jaurtiketa geldiarazi eta horrek gehiegi sufriarazi zion. Erasoko ekintzetan ez zen gaizki ibili, jaurtiketen ia % 70 gola izan baitzen. Defentsako prestazioak hobetu behar ditugu, geratzen diren partidetan gehiegi ez sufritzeko.
Senior nesken porrota Donostiara joan zenean, 24-20 galdu baitzuen Saiekoren aurka. Taldeak beti izan zituen aukerak partidan, baina ezin izan zuen markagailuan hurbildu buelta eman ahal izateko. Atsedenaldira 14-10eko emaitzarekin iritsi ziren donostiarrak.
Ez da gaizki ari talde urdiña defentsan, ez da gol gehiegi jasotzen ari. Erasoko lanetan daukagu arazoa, kosta egiten zaigu gola sartzea, eta horrek oso zaila egiten du garaipena lortzea. Taldea taularen erdialdean mantentzen da, baina aurrerapauso bat eman behar du lehiaketaren azken fasean sartzen saiatzeko.
Gizonezkoen bigarren taldeak 20-36 galdu zuen Munttarperen aurka. Oso partida zaila izango zela aurreikusten zen, igoerarako hautagaietako bat bisitari genuela. Horrez gain, jokalari urdin batzuek lehen taldearekin jokatu behar izan zuten. Partida oso konplexua izan zen eta jokalariek 20 minutuz irautea lortu zuten, hortik aurrera partida amaitu arte itxarotea izan zen, emaitza on bat lortzen saiatuz.
Jubenil mailan zorte gutxi izan zuen bigarren urteko emakumezko taldeak. Ereintza izan zuen aurkari Errenterian, eta partida kaskar batean amore eman behar izan zuen. 34-19 galdu zuen Errenteriako taldearen aurka. Lehen urteko taldea garaipenaren gertu egon zen, baina azkenean 2 golengatik galdu zuen, 24-26 Leizaranen aurka. Gizonezko jubenilak, bere aldetik, saiatu ziren baina azkenean 27-34 galdu zuen Urolaren aurka.
Emakumezkoen kadeteen partida ona, Arrasaten 20-22 gailendu zitzaion talde sarrailagileari Beti aurretik markagailuan eta jokoan, taldeak azken unera arte eutsi zion garaipena lortzeko. Infantil mailan B Ligako emakumezkoen taldea nagusitu zen Majorin Arrasateren aurka, 15-7 izan zen azken markagailua, talde urdinak beti ekimena izan zuen partidan. Gizonezko talde infantilak Pulpo bisitari izan zuen, eta ezin izan zion aurre egin gainera etorri zitzaion joko oldeari. 10-40 izan zen azken markagailua.
.jpg)
